bhige mausam se lipaTne ka natija nikla

bhīge mausam se lipaTne kā natīja niklā

apnā armān bhī kāġhaz kā khilaunā niklā

raat ke āḳhirī hisse meñ ye dekhā maiñ ne

tīrgī chiir ke sūraj kā ujālā niklā

chor hiire kā samajhtī rahī duniyā jis ko

us kī muTThī se to tasbīh kā daana niklā

bas meñ jab kar na sakā us ko kisī mantar se

jaan nāgin se chhuḌā kar vo saperā niklā

taaza phūloñ se vo rishtoñ kī mahak aatī nahīñ

baasī phūloñ se jo gul-dān kā rishta niklā

maiñ ne oḌhā thā jise dhuup se bachne ke liye

vo bhī girtī huī dīvār kā saaya niklā

sāmne jis ke thī hiire kī chamak bhī phīkī

us ko parkhā jo kasauTī pe to shīsha niklā

zalzala aane ke āsār batāne ke liye

phaḌphaḌā kar mire kamre se parinda niklā

tere ash.ār kī 'ashraf' hai ajab jādūgarī

shā.irī kā tirī har shaḳhs divāna niklā

bhige mausam se lipaTne ka natija nikla

apna arman bhi kaghaz ka khilauna nikla

raat ke aaKHiri hisse mein ye dekha main ne

tirgi chir ke suraj ka ujala nikla

chor hire ka samajhti rahi duniya jis ko

us ki muTThi se to tasbih ka dana nikla

bas mein jab kar na saka us ko kisi mantar se

jaan nagin se chhuDa kar wo sapera nikla

taza phulon se wo rishton ki mahak aati nahin

basi phulon se jo gul-dan ka rishta nikla

main ne oDha tha jise dhup se bachne ke liye

wo bhi girti hui diwar ka saya nikla

samne jis ke thi hire ki chamak bhi phiki

us ko parkha jo kasauTi pe to shisha nikla

zalzala aane ke aasar batane ke liye

phaDphaDa kar mere kamre se parinda nikla

tere ashaar ki 'ashraf' hai ajab jadugari

shairi ka teri har shaKHs diwana nikla