bhuke rah kar zindagi ke din bita sakta hun main

bhūke rah kar zindagī ke din bitā saktā huuñ maiñ

maañg kar hargiz nahīñ duniyā meñ khā saktā huuñ maiñ

dostī karnā bahut mushkil nahīñ hai ḳhvāb se

par haqīqat se nahīñ nazreñ churā saktā huuñ maiñ

terī jānib se ishāre kī zarūrat hai mujhe

apnī palkoñ par tujhe dilbar biThā saktā huuñ maiñ

aap kā gar saath ho to zindagānī meñ sanam

jo nahīñ mumkin vo sab kar ke dikhā saktā huuñ maiñ

bech kar īmān gar hāsil ḳhushī karnī paḌe

shauq se tā-‘umr phir aañsū bahā saktā huuñ maiñ

ho mubārak aap ko hī be-dilī aur be-ruḳhī

dil na patthar aap ke jaisā banā saktā huuñ maiñ

bhuke rah kar zindagi ke din bita sakta hun main

mang kar hargiz nahin duniya mein kha sakta hun main

dosti karna bahut mushkil nahin hai KHwab se

par haqiqat se nahin nazren chura sakta hun main

teri jaanib se ishaare ki zarurat hai mujhe

apni palkon par tujhe dilbar biTha sakta hun main

aap ka gar sath ho to zindagani mein sanam

jo nahin mumkin wo sab kar ke dikha sakta hun main

bech kar iman gar hasil KHushi karni paDe

shauq se ta-‘umr phir aansu baha sakta hun main

ho mubarak aap ko hi be-dili aur be-ruKHi

dil na patthar aap ke jaisa bana sakta hun main