bhuli baaton se bhi ab dil ko lagana kaisa

bhūlī bātoñ se bhī ab dil ko lagānā kaisā

raah jo chhoḌ chuke phir vahāñ jaanā kaisā

aql aur ishq kā bāham ye milānā kaisā

aap pahlū meñ haiñ phir hosh meñ aanā kaisā

tār-e-dāman se ulajhtī rahī uljhan merī

kaisī be-chārgī dāman kā baḌhānā kaisā

parkhe hī jaane kā ehsān liye phirtā huuñ

kaisī maqbūliyat aur dil meñ samānā kaisā

dhuup hāthoñ meñ maleñ rañg-e-hinā.ī dekheñ

ḳhvāb hī ḳhvāb haiñ ḳhvāboñ kā Thikāna kaisā

kāñch ke TukḌe hī āñkhoñ kī amānat Thahre

kaisī tā'bīreñ yahāñ ḳhvāb kā aanā kaisā

ghaav ginte meñ hī guzrī hai yahāñ to 'farhat'

kyā ġham-e-dostāñ marham kā lagānā kaisā

bhuli baaton se bhi ab dil ko lagana kaisa

rah jo chhoD chuke phir wahan jaana kaisa

aql aur ishq ka baham ye milana kaisa

aap pahlu mein hain phir hosh mein aana kaisa

tar-e-daman se ulajhti rahi uljhan meri

kaisi be-chaargi daman ka baDhana kaisa

parkhe hi jaane ka ehsan liye phirta hun

kaisi maqbuliyat aur dil mein samana kaisa

dhup hathon mein malen rang-e-hinai dekhen

KHwab hi KHwab hain KHwabon ka Thikana kaisa

kanch ke TukDe hi aankhon ki amanat Thahre

kaisi ta'biren yahan KHwab ka aana kaisa

ghaw ginte mein hi guzri hai yahan to 'farhat'

kya gham-e-dostan marham ka lagana kaisa