bhuli-bisri KHwahishon ka bojh aankhon par na rakh

bhūlī-bisrī ḳhvāhishoñ kā bojh āñkhoñ par na rakh

ḳhūb-sūrat ā.inoñ meñ ġham kā pas-manzar na rakh

dekh baḌh kar shoḳhiyāñ maujoñ kī aur qismat kā khel

kashtiyāñ dariyā ke sanjīda kināroñ par na rakh

yā to uḌ jā saath le kar qaid kī majbūriyāñ

varna apnī jur.atoñ kā naam bāl-o-par na rakh

ham to sar rakhte haiñ sajdoñ ke liye majbūr haiñ

tū agar sajdoñ kā qātil hai to sang-e-dar na rakh

dene vaale sar diyā hai to koī saudā bhī de

varna in kāñdhoñ pe ye bekār bār-e-sar na rakh

bevafā.ī kī alāmat ban chuke asnām sab

dil ke but-ḳhāne meñ 'raunaq' ab koī patthar na rakh

bhuli-bisri KHwahishon ka bojh aankhon par na rakh

KHub-surat aainon mein gham ka pas-manzar na rakh

dekh baDh kar shoKHiyan maujon ki aur qismat ka khel

kashtiyan dariya ke sanjida kinaron par na rakh

ya to uD ja sath le kar qaid ki majburiyan

warna apni juraton ka nam baal-o-par na rakh

hum to sar rakhte hain sajdon ke liye majbur hain

tu agar sajdon ka qatil hai to sang-e-dar na rakh

dene wale sar diya hai to koi sauda bhi de

warna in kandhon pe ye bekar bar-e-sar na rakh

bewafai ki alamat ban chuke asnam sab

dil ke but-KHane mein 'raunaq' ab koi patthar na rakh