bichha hua koi tanhaiyon ka jal na tha

bichhā huā koī tanhā.iyoñ kā jaal na thā

tire firāq se pahle ye ghar kā haal na thā

thake to yuuñ ki hameñ aarzū thī saa.e kī

sa.ūbatoñ se safar kī badan niDhāl na thā

kuchh aise moḌ pe bichhḌe the ham mohabbat meñ

mujhe bhī rañj use bhī koī malāl na thā

nigāh tū ne kisī aur hī pe kī hotī

jo ham shikasta diloñ kā tujhe ḳhayāl na thā

kabhī kabhī koī bādal baras bhī jaatā thā

zamīn-e-shahr kā itnā burā to haal na thā

chhupā huā mirā dushman thā ḳhud mire andar

so apne-āp se bachne kā kuchh savāl na thā

ga.e dinoñ kā tujhe dhyān tak nahīñ 'ḳhāvar'

tirā vo ishq yahī hai jise zavāl na thā

bichha hua koi tanhaiyon ka jal na tha

tere firaq se pahle ye ghar ka haal na tha

thake to yun ki hamein aarzu thi sae ki

saubaton se safar ki badan niDhaal na tha

kuchh aise moD pe bichhDe the hum mohabbat mein

mujhe bhi ranj use bhi koi malal na tha

nigah tu ne kisi aur hi pe ki hoti

jo hum shikasta dilon ka tujhe KHayal na tha

kabhi kabhi koi baadal baras bhi jata tha

zamin-e-shahr ka itna bura to haal na tha

chhupa hua mera dushman tha KHud mere andar

so apne-ap se bachne ka kuchh sawal na tha

gae dinon ka tujhe dhyan tak nahin 'KHawar'

tera wo ishq yahi hai jise zawal na tha