bichhaD kar us ka dil lag bhi gaya to kya lagega

bichhaḌ kar us kā dil lag bhī gayā to kyā lagegā

vo thak jā.egā aur mere gale se aa lagegā

maiñ mushkil meñ tumhāre kaam aa.uuñ yā na aa.uuñ

mujhe āvāz de lenā tumheñ achchhā lagegā

maiñ jis koshish se us ko bhuul jaane meñ lagā huuñ

ziyāda bhī agar lag jaa.e to hafta lagegā

mire hāthoñ se lag kar phuul miTTī ho rahe haiñ

mirī āñkhoñ se dariyā dekhnā sahrā lagegā

mirā dushman sunā hai kal se bhūkā laḌ rahā hai

ye pahlā tiir us ko nāshte meñ jā lagegā

ka.ī din us ke bhī sahrāoñ meñ guzre haiñ 'hāfī'

so is nisbat se ā.īna hamārā kyā lagegā

bichhaD kar us ka dil lag bhi gaya to kya lagega

wo thak jaega aur mere gale se aa lagega

main mushkil mein tumhaare kaam aaun ya na aaun

mujhe aawaz de lena tumhein achchha lagega

main jis koshish se us ko bhul jaane mein laga hun

ziyaada bhi agar lag jae to hafta lagega

mere hathon se lag kar phul miTTi ho rahe hain

meri aankhon se dariya dekhna sahra lagega

mera dushman suna hai kal se bhuka laD raha hai

ye pahla tir us ko nashte mein ja lagega

kai din us ke bhi sahraon mein guzre hain 'hafi'

so is nisbat se aaina hamara kya lagega