bichhaD ke bhi mila ruswaiyon ka qahr tujhe

bichhaḌ ke bhī milā rusvā.iyoñ kā qahr tujhe

chhupā sakā na tire āñsuoñ kā shahr tujhe

ye chaḌhtī dhuup kā malbūs utaar de sar-e-shām

utartī dhuup meñ ab dekhtā hai shahr tujhe

har ek sail-e-sadā ko tū kar gayā pāyāb

Dubo sakī na mirī chāhatoñ kī nahr tujhe

bikhartī kirnoñ ko āñgan meñ thāmne vaale

mah-e-tamām kā piinā paḌegā zahr tujhe

tū chhoḌ aayā jise Dūbte jazīre meñ

dikhā.ī degā vahī chehra lahr lahr tujhe

badan ko toḌ ke bāhar nikal bhī aa kisī shab

hisār-e-jism meñ jiine na degā dahr tujhe

'musavvir' us kā mudāvā bhī tū ne kuchh sochā

vo rog jo liye phirtā hai shahr shahr tujhe

bichhaD ke bhi mila ruswaiyon ka qahr tujhe

chhupa saka na tere aansuon ka shahr tujhe

ye chaDhti dhup ka malbus utar de sar-e-sham

utarti dhup mein ab dekhta hai shahr tujhe

har ek sail-e-sada ko tu kar gaya payab

Dubo saki na meri chahaton ki nahr tujhe

bikharti kirnon ko aangan mein thamne wale

mah-e-tamam ka pina paDega zahr tujhe

tu chhoD aaya jise Dubte jazire mein

dikhai dega wahi chehra lahr lahr tujhe

badan ko toD ke bahar nikal bhi aa kisi shab

hisar-e-jism mein jine na dega dahr tujhe

'musawwir' us ka mudawa bhi tu ne kuchh socha

wo rog jo liye phirta hai shahr shahr tujhe