bichhaD ke tujhse mayassar hue visal ke din

bichhaḌ ke tujh se mayassar hue visāl ke din

haiñ tere ḳhvāb kī rāteñ tire ḳhayāl ke din

firāq-e-jāñ kā zamāna guzārnā hogā

fuġhāñ se kam to na hoñge ye māh-o-sāl ke din

har ik amal kā vo kyā kyā javāz rakhtā hai

na ban paḌegā javāb ek bhī savāl ke din

urūj-e-baḳht mubārak magar ye dhyān rahe

inhī dinoñ ke ta.āqub meñ haiñ zavāl ke din

guzar rahe haiñ kuchh is tarah roz o shab apne

ki jis tarah se kaTeñ shāḳh-e-be-nihāl ke din

shikāyateñ bhī bahut haiñ hikāyateñ bhī bahut

guzar na jaa.eñ yūñhī ahd-e-be-misāl ke din

vo zindagī ko nayā moḌ de gayā 'mohsin'

yahī zavāl ke din haiñ mire kamāl ke din

bichhaD ke tujh se mayassar hue visal ke din

hain tere KHwab ki raaten tere KHayal ke din

firaq-e-jaan ka zamana guzarna hoga

fughan se kam to na honge ye mah-o-sal ke din

har ek amal ka wo kya kya jawaz rakhta hai

na ban paDega jawab ek bhi sawal ke din

uruj-e-baKHt mubarak magar ye dhyan rahe

inhi dinon ke taaqub mein hain zawal ke din

guzar rahe hain kuchh is tarah roz o shab apne

ki jis tarah se kaTen shaKH-e-be-nihaal ke din

shikayaten bhi bahut hain hikayaten bhi bahut

guzar na jaen yunhi ahd-e-be-misal ke din

wo zindagi ko naya moD de gaya 'mohsin'

yahi zawal ke din hain mere kamal ke din