bichhaD ke us se abhi hun zinda magar bahut pur-malal ab tak

bichhaḌ ke us se abhī huuñ zinda magar bahut pur-malāl ab tak

ḳhabar nahīñ vo sañbhal chukā hai yā vo bhī hai ḳhasta-hāl ab tak

mujhe tirā intizār kyoñ hai ye dil mirā be-qarār kyoñ hai

mire ḳhayāl-o-nazar meñ dekho yahī hai bas ik savāl ab tak

kahā gayā vaqt saare zaḳhmoñ kā aap marham banegā ik din

kaho ki zaḳhmoñ kā kyoñ nahīñ ho sakā bhalā indimāl ab tak

kahāñ ye mumkin ki bhuul jā.ūñ maiñ zindagī kī hasīn yādeñ

batā.ūñ kaise ki hijr meñ huuñ maiñ ranj-o-ġham se niDhāl ab tak

maiñ ek mash.al maiñ ek jugnū maiñ ek sham-e-vafā huuñ 'shāhīñ'

mire ḳhudā ne rakhā huā hai mujhe to yuuñ ḳhush-ḳhayāl ab tak

bichhaD ke us se abhi hun zinda magar bahut pur-malal ab tak

KHabar nahin wo sanbhal chuka hai ya wo bhi hai KHasta-haal ab tak

mujhe tera intizar kyon hai ye dil mera be-qarar kyon hai

mere KHayal-o-nazar mein dekho yahi hai bas ek sawal ab tak

kaha gaya waqt sare zaKHmon ka aap marham banega ek din

kaho ki zaKHmon ka kyon nahin ho saka bhala indimal ab tak

kahan ye mumkin ki bhul jaun main zindagi ki hasin yaaden

bataun kaise ki hijr mein hun main ranj-o-gham se niDhaal ab tak

main ek mashal main ek jugnu main ek sham-e-wafa hun 'shahin'

mere KHuda ne rakha hua hai mujhe to yun KHush-KHayal ab tak