bigaD jate the sun kar yaad hai kuchh wo zamana bhi

bigaḌ jaate the sun kar yaad hai kuchh vo zamāna bhī

koī kartā thā jab merī shikāyat ġhā.ebāna bhī

vo jis par mehrbāñ hote haiñ duniyā us kī hotī hai

nazar un kī palaTte hī palaTtā hai zamāna bhī

sunā kartā huuñ ta.ane hijr meñ kyā kyā raqīboñ ke

banā huuñ is mohabbat meñ malāmat kā nishāna bhī

yahāñ bhī farz hai zāhid adab se sar jhukā lenā

mire nazdīk ka.aba hai kisī kā āstāna bhī

fareb-e-dām meñ laa.ī hai kuchh sayyād kī ḳhātir

qafas meñ khīñch kar laayā hameñ kuchh āb-o-dāna bhī

jalā kar dil mirā sayyād kā ThanDā kaleja kar

kahīñ ai barq jaldī phūñk merā āshiyāna bhī

bigaḌte der hotī hai na bante der hotī hai

mizāj-e-yār se kuchh miltā-jultā hai zamāna bhī

hasīñ paḌh kar ġhazal merī mire mushtāq hote haiñ

musaḳhḳhar dil ko kartā hai kalām-e-āshiqāna bhī

na bhūlegī hafīz ahbāb ko ye sarguzisht apnī

jahāñ meñ yaad rah jā.egā kuchh apnā fasāna bhī

bigaD jate the sun kar yaad hai kuchh wo zamana bhi

koi karta tha jab meri shikayat ghaebana bhi

wo jis par mehrban hote hain duniya us ki hoti hai

nazar un ki palaTte hi palaTta hai zamana bhi

suna karta hun tane hijr mein kya kya raqibon ke

bana hun is mohabbat mein malamat ka nishana bhi

yahan bhi farz hai zahid adab se sar jhuka lena

mere nazdik kaba hai kisi ka aastana bhi

fareb-e-dam mein lai hai kuchh sayyaad ki KHatir

qafas mein khinch kar laya hamein kuchh aab-o-dana bhi

jala kar dil mera sayyaad ka ThanDa kaleja kar

kahin ai barq jaldi phunk mera aashiyana bhi

bigaDte der hoti hai na bante der hoti hai

mizaj-e-yar se kuchh milta-julta hai zamana bhi

hasin paDh kar ghazal meri mere mushtaq hote hain

musaKHKHar dil ko karta hai kalam-e-ashiqana bhi

na bhulegi hafiz ahbab ko ye sarguzisht apni

jahan mein yaad rah jaega kuchh apna fasana bhi