bigaDte bante daere sawal sochte rahe

bigaḌte bante dā.ere savāl sochte rahe

na jaane kis ke the vo ḳhadd-o-ḳhāl sochte rahe

jo rū-numā nahīñ huā vo marhala Darā gayā

mileñge kaise us se māh-o-sāl sochte rahe

sitāra-dar-sitāra shaam utrī hogī lawn par

akele baiThe ham ba-sad-malāl sochte rahe

'ajīb moḌ sāmne the ḳhvāb ḳhvāb bastiyāñ

bichhaḌ ke baaqī 'umr kā ma.aal sochte rahe

mile the tum to TuuT kar hamīñ the ġhair mutma.in

hazār fāsle pas-e-visāl sochte rahe

hamīñ yahāñ vo ḳhush-qayās-ḳhush-gumāñ parind the

ḳhayām-e-reg meñ jo barshgāl sochte rahe

bigaDte bante daere sawal sochte rahe

na jaane kis ke the wo KHadd-o-KHal sochte rahe

jo ru-numa nahin hua wo marhala Dara gaya

milenge kaise us se mah-o-sal sochte rahe

sitara-dar-sitara sham utri hogi lawn par

akele baiThe hum ba-sad-malal sochte rahe

'ajib moD samne the KHwab KHwab bastiyan

bichhaD ke baqi 'umr ka maal sochte rahe

mile the tum to TuT kar hamin the ghair mutmain

hazar fasle pas-e-visal sochte rahe

hamin yahan wo KHush-qayas-KHush-guman parind the

KHayam-e-reg mein jo barshgal sochte rahe