bigDen wo humse ki hum un se sab mein ek lazzat hoti hai

bigḌeñ vo ham se ki ham un se sab meñ ik lazzat hotī hai

jiine meñ baḌā lutf aatā hai jab dil se mohabbat hotī hai

ham kis se pūchheñ tum hī kaho kuchh kaam ye jiinā aayā bhī

ham loTte haiñ añgāroñ par kuchh tum ko masarrat hotī hai

dozaḳh ko yahī jannat kar de jannat ko yahī dozaḳh kar de

ham tujh ko batā.eñ kyā hamdam kyā chiiz mohabbat hotī hai

ham bāda-o-jām ke parde meñ kuchh rāz-e-junūñ kah jaate haiñ

jab ishq kā nashsha chaḌhtā hai maḳhmūr tabī.at hotī hai

ham marte haiñ yā jiite haiñ tum shaad raho ābād raho

kyā tum se kaheñ kyā hotā hai jab hijr kī saa.at hotī hai

ab is meñ hamārī kyā hai ḳhatā majbūr se haiñ lāchār se haiñ

dil hai to mohabbat karte haiñ tum ho to mohabbat hotī hai

parvarda-e-sāhil kyā jaane āsūda-e-manzil kyā samjhe

jo duur haiñ sāhil-o-manzil se un kī kyā hālat hotī hai

jab josh-e-masarrat hotā hai ham aap se kho.e jaate haiñ

hastī meñ bharam aa jaatā hai jab ġham kī shiddat hotī hai

maiñ husn kā ek pujārī huuñ hai shā.irī husn kī ik devī

jo fikr-e-suḳhan bhī hotī hai ham-rañg-e-ibādat hotī hai

bigDen wo hum se ki hum un se sab mein ek lazzat hoti hai

jine mein baDa lutf aata hai jab dil se mohabbat hoti hai

hum kis se puchhen tum hi kaho kuchh kaam ye jina aaya bhi

hum loTte hain angaron par kuchh tum ko masarrat hoti hai

dozaKH ko yahi jannat kar de jannat ko yahi dozaKH kar de

hum tujh ko bataen kya hamdam kya chiz mohabbat hoti hai

hum baada-o-jam ke parde mein kuchh raaz-e-junun kah jate hain

jab ishq ka nashsha chaDhta hai maKHmur tabiat hoti hai

hum marte hain ya jite hain tum shad raho aabaad raho

kya tum se kahen kya hota hai jab hijr ki saat hoti hai

ab is mein hamari kya hai KHata majbur se hain lachaar se hain

dil hai to mohabbat karte hain tum ho to mohabbat hoti hai

parwarda-e-sahil kya jaane aasuda-e-manzil kya samjhe

jo dur hain sahil-o-manzil se un ki kya haalat hoti hai

jab josh-e-masarrat hota hai hum aap se khoe jate hain

hasti mein bharam aa jata hai jab gham ki shiddat hoti hai

main husn ka ek pujari hun hai shairi husn ki ek dewi

jo fikr-e-suKHan bhi hoti hai ham-rang-e-ibaadat hoti hai