bigDi baat banana mushkil bigDi baat banae kaun

bigḌī baat banānā mushkil bigḌī baat banā.e kaun

kunj-e-tamannā vīrāna hai aa kar phuul khilā.e kaun

tan kī daulat man kī daulat sab ḳhvāboñ kī bāteñ haiñ

nau man tel na ho to ghar meñ rādhā ko nachvā.e kaun

apnā ġham ab ḳhud hī uThā le varna rusvā.ī hogī

terā bhed chhupā kar dil meñ nāhaq bojh uThā.e kaun

chaltī gaaḌī naam kā rishta kyā mohan kyā rādhā aaj

ban ke sañvar ke raas rachā ke mohan aaj manā.e kaun

sāgar paar kī ḳhabreñ dekhe ham-sā.e kā patā nahīñ

aaj kā insāñ aalam fāzil us ko ab samjhā.e kaun

nā-ummīdī nām-e-tamannā apnā muqaddar hijr-e-musalsal

dard ke ḳhāristān meñ aa ke dāman-e-dil uljhā.e kaun

raat bhī kaalī chādar oḌhe aa pahuñchī hai ziine meñ

mehñdī lagā.e baiThī soche laT uljhī suljhā.e kaun

bigDi baat banana mushkil bigDi baat banae kaun

kunj-e-tamanna virana hai aa kar phul khilae kaun

tan ki daulat man ki daulat sab KHwabon ki baaten hain

nau man tel na ho to ghar mein radha ko nachwae kaun

apna gham ab KHud hi uTha le warna ruswai hogi

tera bhed chhupa kar dil mein nahaq bojh uThae kaun

chalti gaDi nam ka rishta kya mohan kya radha aaj

ban ke sanwar ke ras racha ke mohan aaj manae kaun

sagar par ki KHabren dekhe ham-sae ka pata nahin

aaj ka insan aalam fazil us ko ab samjhae kaun

na-ummidi nam-e-tamanna apna muqaddar hijr-e-musalsal

dard ke KHaristan mein aa ke daman-e-dil uljhae kaun

raat bhi kali chadar oDhe aa pahunchi hai zine mein

mehndi lagae baiThi soche laT uljhi suljhae kaun