bigDi hui jab hoti hai taqdir kisi ki

bigḌī huī jab hotī hai taqdīr kisī kī

kaam aatī nahīñ aise meñ tadbīr kisī kī

dil jiit liye apnoñ ke begānoñ ke pal meñ

guftār meñ aisī bhī hai tāsīr kisī kī

ye fāteh-e-aqlīm to ho saktī hai lekin

dil jiit na paa.ī kabhī shamshīr kisī kī

tahzīb-o-tamaddun kā chalan uTh gayā shāyad

kartā hai kahāñ ab koī tauqīr kisī kī

allāh re ye adl ye mīzān-e-adālat

paatā hai sazā koī hai taqsīr kisī kī

so.e haiñ abhī ahl-e-junūñ qaid-e-qafas meñ

pairoñ meñ khanaktī nahīñ zanjīr kisī kī

har lab pe faqat amn kī bāteñ hoñ ḳhudāyā

ho vajh-e-fasādāt na taqrīr kisī kī

ye husn kā e.ajāz hai yā nashsha-e-mai hai

sāġhar meñ utar aa.ī hai tasvīr kisī kī

shohrat kī tamanna hai to kar jehd-e-musalsal

'ahsan' yūñhī hotī nahīñ tash.hīr kisī kī

bigDi hui jab hoti hai taqdir kisi ki

kaam aati nahin aise mein tadbir kisi ki

dil jit liye apnon ke beganon ke pal mein

guftar mein aisi bhi hai tasir kisi ki

ye fateh-e-aqlim to ho sakti hai lekin

dil jit na pai kabhi shamshir kisi ki

tahzib-o-tamaddun ka chalan uTh gaya shayad

karta hai kahan ab koi tauqir kisi ki

allah re ye adl ye mizan-e-adalat

pata hai saza koi hai taqsir kisi ki

soe hain abhi ahl-e-junun qaid-e-qafas mein

pairon mein khanakti nahin zanjir kisi ki

har lab pe faqat amn ki baaten hon KHudaya

ho wajh-e-fasadat na taqrir kisi ki

ye husn ka eajaz hai ya nashsha-e-mai hai

saghar mein utar aai hai taswir kisi ki

shohrat ki tamanna hai to kar jehd-e-musalsal

'ahsan' yunhi hoti nahin tashhir kisi ki