bimar-e-gham hun kar-e-masiha kare koi

bīmār-e-ġham huuñ kār-e-masīhā kare koī

dard-e-dil-o-jigar kā mudāvā kare koī

zauq-e-nazar 'kalīm' kā paidā kare koī

phir dīd-e-husn-e-yār kā da.avā kare koī

miltā nahīñ vafā kā vafā se kahīñ javāb

phir ḳhaak dostoñ pe bharosā kare koī

pās-e-hayā nahīñ unheñ josh-e-shabāb meñ

un kī bhī aarzū hai ki dekhā kare koī

dekhā jo mahv-e-husn to bole ba-sad-itāb

mujh ko na is nigāh se dekhā kare koī

jab dushman-e-vafā tumheñ 'aslam' samajh chukā

phir kyoñ vafā kī tum se tamanna kare koī

bimar-e-gham hun kar-e-masiha kare koi

dard-e-dil-o-jigar ka mudawa kare koi

zauq-e-nazar 'kalim' ka paida kare koi

phir did-e-husn-e-yar ka dawa kare koi

milta nahin wafa ka wafa se kahin jawab

phir KHak doston pe bharosa kare koi

pas-e-haya nahin unhen josh-e-shabab mein

un ki bhi aarzu hai ki dekha kare koi

dekha jo mahw-e-husn to bole ba-sad-itab

mujh ko na is nigah se dekha kare koi

jab dushman-e-wafa tumhein 'aslam' samajh chuka

phir kyon wafa ki tum se tamanna kare koi