bimar hain to ab dam-e-isa kahan se aae

bīmār haiñ to ab dam-e-īsā kahāñ se aa.e

is dil meñ dard-e-shauq-o-tamannā kahāñ se aa.e

bekār sharh-e-lafz-o-ma.ānī se fā.eda

jab tū nahīñ to shahr meñ tujh sā kahāñ se aa.e

har chashm sañg-e-kizb-o-adāvat se surḳh hai

ab aadmī ko zindagī karnā kahāñ se aa.e

vahshat havas kī chaaT ga.ī ḳhāk-e-jism ko

be-dar gharoñ meñ shakl kā saaya kahāñ se aa.e

jaḌ se ukhaḌ ga.e to badaltī rutoñ se kyā

be-āb ā.inoñ meñ sarāpā kahāñ se aa.e

sāyoñ pe e'timād se uktā gayā hai jī

tūfāñ meñ zindagī kā bharosa kahāñ se aa.e

ġham ke thapeḌe le ga.e nāgan se lambe baal

rātoñ meñ jañgaloñ kā vo saaya kahāñ se aa.e

'nāhīd' faishanoñ ne chhupā.e haiñ aib bhī

chashme na hoñ to aañkh kā parda kahāñ se aa.e

bimar hain to ab dam-e-isa kahan se aae

is dil mein dard-e-shauq-o-tamanna kahan se aae

bekar sharh-e-lafz-o-maani se faeda

jab tu nahin to shahr mein tujh sa kahan se aae

har chashm sang-e-kizb-o-adawat se surKH hai

ab aadmi ko zindagi karna kahan se aae

wahshat hawas ki chaT gai KHak-e-jism ko

be-dar gharon mein shakl ka saya kahan se aae

jaD se ukhaD gae to badalti ruton se kya

be-ab aainon mein sarapa kahan se aae

sayon pe e'timad se ukta gaya hai ji

tufan mein zindagi ka bharosa kahan se aae

gham ke thapeDe le gae nagan se lambe baal

raaton mein jangalon ka wo saya kahan se aae

'nahid' faishanon ne chhupae hain aib bhi

chashme na hon to aankh ka parda kahan se aae