bite lamhon ki KHushbuen zaKHmon ki saughat mili

biite lamhoñ kī ḳhushbūeñ zaḳhmoñ kī sauġhāt milī

tanhā.ī ke sūne-pan meñ yādoñ kī bārāt milī

itne patthar barsā.e haiñ phuul se nāzuk hoñToñ ne

zaḳhmoñ ke ik Dher ke nīche kuchlī apnī zaat milī

TuuTe haiñ har ek qadam par bikhre haiñ har moḌ pe ham

sang-diloñ ke shahr meñ ham ko shīshe kī auqāt milī

dil ke lahū ne aañsū ban kar ġham ko suhānā-pan baḳhshā

jalte sahrā meñ bhī ham ko rangoñ kī barsāt milī

hañs hañs ke har zor-e-sitam ko ham ne dil par rok liyā

is shīshe se jo Takrāyā us patthar ko maat milī

yādoñ kā ban-bās likhā thā apne raam kī qismat meñ

ham ko bharī ābādī meñ bhī tanhā apnī zaat milī

apne dil ko aur jalā kar ham ne ujālā phailāyā

jis manzil par jis raste meñ 'badr' jahāñ tak raat malī

bite lamhon ki KHushbuen zaKHmon ki saughat mili

tanhai ke sune-pan mein yaadon ki baraat mili

itne patthar barsae hain phul se nazuk honTon ne

zaKHmon ke ek Dher ke niche kuchli apni zat mili

TuTe hain har ek qadam par bikhre hain har moD pe hum

sang-dilon ke shahr mein hum ko shishe ki auqat mili

dil ke lahu ne aansu ban kar gham ko suhana-pan baKHsha

jalte sahra mein bhi hum ko rangon ki barsat mili

hans hans ke har zor-e-sitam ko hum ne dil par rok liya

is shishe se jo Takraya us patthar ko mat mili

yaadon ka ban-bas likha tha apne ram ki qismat mein

hum ko bhari aabaadi mein bhi tanha apni zat mili

apne dil ko aur jala kar hum ne ujala phailaya

jis manzil par jis raste mein 'badr' jahan tak raat mali