bikhar bikhar gae alfaz se ada na hue

bikhar bikhar ga.e alfāz se adā na hue

ye zamzame jo kisī dard kī davā na hue

safar meñ gosh bar āvāz thā har ik zarra

khulā thā sāmne sahrā hameñ sadā na hue

na.ī havā meñ mahak hai purāne pattoñ kī

jo ḳhaak ho ga.e par shāḳh se judā na hue

havā ke saath ka.ī ashk se uḌe to sahī

kisī to retīlī miTTī kā āb-o-dāna hue

ġhazal meñ the bahut āzāda-rū 'zafar' lekin

talāzumāt kī zanjīr se rihā na hue

bikhar bikhar gae alfaz se ada na hue

ye zamzame jo kisi dard ki dawa na hue

safar mein gosh bar aawaz tha har ek zarra

khula tha samne sahra hamein sada na hue

nai hawa mein mahak hai purane patton ki

jo KHak ho gae par shaKH se juda na hue

hawa ke sath kai ashk se uDe to sahi

kisi to retili miTTi ka aab-o-dana hue

ghazal mein the bahut aazada-ru 'zafar' lekin

talazumat ki zanjir se riha na hue