bojh bachchon ko uThane ki saza mat dena

bojh bachchoñ ko uThāne kī sazā mat denā

aur jiine kī buzurgoñ ko duā mat denā

gosha-e-dil meñ dabī ek jo chingārī hai

ḳhud bhaḌak jā.egī ik roz havā mat denā

ḳhud miTā deñge ye alfāz siyāhī apnī

bū-e-tahrīr hai kāġhaz pe jalā mat denā

are phaldār daraḳhtoñ pe bhī un kā haq hai

dekh shāḳhoñ se parindoñ ko uḌā mat denā

raat bhar jaag ke ta.amīr kiyā hai ye mahal

lafz-e-inkār se buniyād hilā mat denā

is ḳhatā par kahīñ mahshar meñ na rusvā.ī ho

aaj 'rāshid' ko nigāhoñ se girā mat denā

bojh bachchon ko uThane ki saza mat dena

aur jine ki buzurgon ko dua mat dena

gosha-e-dil mein dabi ek jo chingari hai

KHud bhaDak jaegi ek roz hawa mat dena

KHud miTa denge ye alfaz siyahi apni

bu-e-tahrir hai kaghaz pe jala mat dena

are phaldar daraKHton pe bhi un ka haq hai

dekh shaKHon se parindon ko uDa mat dena

raat bhar jag ke tamir kiya hai ye mahal

lafz-e-inkar se buniyaad hila mat dena

is KHata par kahin mahshar mein na ruswai ho

aaj 'rashid' ko nigahon se gira mat dena