boriya bistar uTha curfew laga hai

boriyā bistar uThā curfew lagā hai

mat kisī ko de sadā curfew lagā hai

ghūmte haiñ sirf sannāTe galī meñ

aadmī hai lāpata curfew lagā hai

ek suuba ek jañgal ho gayā hai

jal rahā hai har zilā' curfew lagā hai

aag kā dariyā makānoñ tak na pahuñche

ho dukānoñ kā bhalā curfew lagā hai

bhar gayā hai peT lāshoñ se saḌak kā

ho ga.ī hai intihā curfew lagā hai

rah gayā padchāp ko āñgan taras kar

so gayā hai rāsta curfew lagā hai

chāquoñ ke aur talvāroñ ke saa.e

zindagī par haiñ fidā curfew lagā hai

kal kā sūraj kyā dikhā.e raam jaane

aaj ik hafta huā curfew lagā hai

boriya bistar uTha curfew laga hai

mat kisi ko de sada curfew laga hai

ghumte hain sirf sannaTe gali mein

aadmi hai lapata curfew laga hai

ek suba ek jangal ho gaya hai

jal raha hai har zila' curfew laga hai

aag ka dariya makanon tak na pahunche

ho dukanon ka bhala curfew laga hai

bhar gaya hai peT lashon se saDak ka

ho gai hai intiha curfew laga hai

rah gaya padchap ko aangan taras kar

so gaya hai rasta curfew laga hai

chaquon ke aur talwaron ke sae

zindagi par hain fida curfew laga hai

kal ka suraj kya dikhae ram jaane

aaj ek hafta hua curfew laga hai