bughz nafrat ko bahut dur kahin rakhte hain

buġhz nafrat ko bahut duur kahīñ rakhte haiñ

ḳhāna-e-dil meñ mohabbat kā makīñ rakhte haiñ

ham tirī samt bikhereñge duā ke jugnū

ik yahī lafz-e-hunar apne ta.iiñ rakhte haiñ

ham laboñ par hī sajāte haiñ tabassum ke gulāb

lazzat-e-dard-e-anā dil ke qarīñ rakhte haiñ

haiñ tar-o-tāza tirī fikr ke gul-būTe to

ham bhī ḳhush-rang ḳhayālāt zamīñ rakhte haiñ

fāqa-mastī se hī fursat nahīñ miltī 'aḳhtar'

varna kashkol meñ ham nān-e-javīñ rakhte haiñ

bughz nafrat ko bahut dur kahin rakhte hain

KHana-e-dil mein mohabbat ka makin rakhte hain

hum teri samt bikherenge dua ke jugnu

ek yahi lafz-e-hunar apne tain rakhte hain

hum labon par hi sajate hain tabassum ke gulab

lazzat-e-dard-e-ana dil ke qarin rakhte hain

hain tar-o-taza teri fikr ke gul-buTe to

hum bhi KHush-rang KHayalat zamin rakhte hain

faqa-masti se hi fursat nahin milti 'aKHtar'

warna kashkol mein hum nan-e-jawin rakhte hain