bujh jae jo dil naghz-bayani nahin rahti

bujh jaa.e jo dil naġhz-bayānī nahīñ rahtī

sūkhe hue dariyā meñ ravānī nahīñ rahtī

kar sakte nahīñ ham nayā andāz hī paidā

qaa.em bhī ravish apnī purānī nahīñ rahtī

raat āñkhoñ hī āñkhoñ meñ guzar jaatī hai aise

jab sub.h nikaltī hai suhānī nahīñ rahtī

sanjīda za.īfī kā use maqbara kahiye

jis jism meñ shorīda javānī nahīñ rahtī

jab bolne lagtī hai nazar us kī fasāhat

yāroñ kī hamāre hama-dānī nahīñ rahtī

ho sher zabāñ-zad to koī vāqi.a hogā

yādoñ meñ faqat koī kahānī nahīñ rahtī

paatā huuñ panapte hue 'shaukat' jo badī ko

nekī se mirī nek-gumānī nahīñ rahtī

bujh jae jo dil naghz-bayani nahin rahti

sukhe hue dariya mein rawani nahin rahti

kar sakte nahin hum naya andaz hi paida

qaem bhi rawish apni purani nahin rahti

raat aankhon hi aankhon mein guzar jati hai aise

jab subh nikalti hai suhani nahin rahti

sanjida zaifi ka use maqbara kahiye

jis jism mein shorida jawani nahin rahti

jab bolne lagti hai nazar us ki fasahat

yaron ki hamare hama-dani nahin rahti

ho sher zaban-zad to koi waqia hoga

yaadon mein faqat koi kahani nahin rahti

pata hun panapte hue 'shaukat' jo badi ko

neki se meri nek-gumani nahin rahti