bujha ke rakh de ye koshish bahut hawa ki thi

bujhā ke rakh de ye koshish bahut havā kī thī

magar charāġh meñ kuchh raushnī anā kī thī

mirī shikast meñ kyā kyā the muzmarāt na pūchh

adū kā haath thā aur chaal āshnā kī thī

faqīh-e-shahr ne be-zār kar diyā varna

diloñ meñ qadr bahut ḳhāna-e-ḳhudā kī thī

abhī se tum ne dhuāñ-dār kar diyā māhaul

abhī to saañs hī lene kī ibtidā kī thī

shikast vo thī ki jab merī sar-bulandī kī

mire adū ne mire vāste duā kī thī

ham ab ġhubār-e-mah-o-sāl kī lapeT meñ haiñ

hamāre chehre pe raunaq kabhī balā kī thī

bujha ke rakh de ye koshish bahut hawa ki thi

magar charagh mein kuchh raushni ana ki thi

meri shikast mein kya kya the muzmaraat na puchh

adu ka hath tha aur chaal aashna ki thi

faqih-e-shahr ne be-zar kar diya warna

dilon mein qadr bahut KHana-e-KHuda ki thi

abhi se tum ne dhuan-dar kar diya mahaul

abhi to sans hi lene ki ibtida ki thi

shikast wo thi ki jab meri sar-bulandi ki

mere adu ne mere waste dua ki thi

hum ab ghubar-e-mah-o-sal ki lapeT mein hain

hamare chehre pe raunaq kabhi bala ki thi