bulawa kaun sa koh-e-nida mein rakkha hai

bulāvā kaun sā koh-e-nidā meñ rakkhā hai

charāġh ham ne jo apnā havā meñ rakkhā hai

vo chāhe baḳhsh de zillat ki sarfarāz kare

bas ik yaqīñ hai jo ham ne ḳhudā meñ rakkhā hai

adam vajūd meñ bhartī hai ik rag-e-maujūd

ab aur is ke sivā kyā duā meñ rakkhā hai

na ḳhud-shanāsī agar ho to kyā nashāt-e-ishq

raqam na ho to kyā harf-e-navā meñ rakkhā hai

safar na ho to ye lutf-e-safar hai be-ma.anī

badan na ho to bhalā kyā qabā meñ rakkhā hai

jo dekho ġhaur se kuchh kam nahīñ hai ye bhī 'tūr'

ik iztirār sukūn-e-havā meñ rakkhā hai

bulawa kaun sa koh-e-nida mein rakkha hai

charagh hum ne jo apna hawa mein rakkha hai

wo chahe baKHsh de zillat ki sarfaraaz kare

bas ek yaqin hai jo hum ne KHuda mein rakkha hai

adam wajud mein bharti hai ek rag-e-maujud

ab aur is ke siwa kya dua mein rakkha hai

na KHud-shanasi agar ho to kya nashat-e-ishq

raqam na ho to kya harf-e-nawa mein rakkha hai

safar na ho to ye lutf-e-safar hai be-mani

badan na ho to bhala kya qaba mein rakkha hai

jo dekho ghaur se kuchh kam nahin hai ye bhi 'tur'

ek iztirar sukun-e-hawa mein rakkha hai