buland azm ho gaya paron mein kaT aa gai

buland azm ho gayā paroñ meñ kaaT aa ga.ī

havā to aur tā.eroñ kī himmateñ baḌhā ga.ī

khilegā dil kā phuul bhī zarā sā intizār kar

abhī ye jāñ-fazā ḳhabar sabā mujhe sunā ga.ī

hisār-e-zāt se pare jahān ek aur hai

mujhe ye vus.at-e-nazar nayā ufuq dikhā ga.ī

banā.e the jo aarzū ne sāhiloñ pe baiTh kar

tamām ret ke vo ghar bas ek mauj Dhā ga.ī

hameñ to ḳhauf thā yahī ki ḳhaak kar na deñ kahīñ

lagī jo aag ishq kī to ā.īna banā ga.ī

parā.e āñchaloñ meñ vo to chhāñv DhūñDhtā rahā

idhar havā-e-be-rahm ridā mirī uḌā ga.ī

chalo ki kal mileñge phir ye qisse kal pe chhoḌ do

zamīñ pe qumqume jale falak pe raat chhā ga.ī

jo 'nusrat' aaj kho ga.ī udāsiyoñ meñ do ghaḌī

gumān sab ko ye huā ġhamoñ se maat khā ga.ī

buland azm ho gaya paron mein kaT aa gai

hawa to aur taeron ki himmaten baDha gai

khilega dil ka phul bhi zara sa intizar kar

abhi ye jaan-faza KHabar saba mujhe suna gai

hisar-e-zat se pare jahan ek aur hai

mujhe ye wusat-e-nazar naya ufuq dikha gai

banae the jo aarzu ne sahilon pe baiTh kar

tamam ret ke wo ghar bas ek mauj Dha gai

hamein to KHauf tha yahi ki KHak kar na den kahin

lagi jo aag ishq ki to aaina bana gai

parae aanchalon mein wo to chhanw DhunDhta raha

idhar hawa-e-be-rahm rida meri uDa gai

chalo ki kal milenge phir ye qisse kal pe chhoD do

zamin pe qumqume jale falak pe raat chha gai

jo 'nusrat' aaj kho gai udasiyon mein do ghaDi

guman sab ko ye hua ghamon se mat kha gai