bulandi par pahunchna hai to paida KHaksari kar

bulandī par pahuñchnā hai to paidā ḳhāksārī kar

baḌā ban ne kī ḳhvāhish hai to ijz-o-inkisārī kar

agar hañsne kī ḳhvāhish hai to 'ādat Daal rone kī

sukūñ darkār hai tujh ko to paidā be-qarārī kar

sar-e-taslīm ḳham kar de mizāj-e-yār ke aage

jo lāzim chiiz hai is ko na sābit iḳhtiyārī kar

burā.ī karne vāloñ ko tū hañs kar darguzar kar de

ḳhushāmad karne vāloñ se tū zāhir nā-gavārī kar

yaqīnan nār-e-dozaḳh sard hogī chand qatroñ se

nadāmat se zarā gardan jhukā kar ashk-bārī kar

faqat aage nazar rakhne meñ gir jaane kā ḳhatra hai

to pīchhe dekh kar chalne kī nādāñ hoshiyārī kar

ye dīvānoñ kī duniyā hai ajab kuchh baat hai is kī

sukūn-e-qalb ko pūchhā to bole āh-o-zārī kar

bulandi par pahunchna hai to paida KHaksari kar

baDa ban ne ki KHwahish hai to ijz-o-inkisari kar

agar hansne ki KHwahish hai to 'adat Dal rone ki

sukun darkar hai tujh ko to paida be-qarari kar

sar-e-taslim KHam kar de mizaj-e-yar ke aage

jo lazim chiz hai is ko na sabit iKHtiyari kar

burai karne walon ko tu hans kar darguzar kar de

KHushamad karne walon se tu zahir na-gawari kar

yaqinan nar-e-dozaKH sard hogi chand qatron se

nadamat se zara gardan jhuka kar ashk-bari kar

faqat aage nazar rakhne mein gir jaane ka KHatra hai

to pichhe dekh kar chalne ki nadan hoshiyari kar

ye diwanon ki duniya hai ajab kuchh baat hai is ki

sukun-e-qalb ko puchha to bole aah-o-zari kar