bulandiyon ka tha jo musafir wo pastiyon se guzar raha hai

bulandiyoñ kā thā jo musāfir vo pastiyoñ se guzar rahā hai

tamām din kā sulagtā sūraj samundaroñ meñ utar rahā hai

tumhārī yādoñ ke phuul aise sahar ko āvāz de rahe haiñ

ki jaise ThanDī havā kā jhoñkā mirī galī se guzar rahā hai

alag haiñ nazreñ alag nazāre ajab haiñ rāz-o-niyāz saare

kisī ke jazbe chamak rahe haiñ kisī kā ehsās mar rahā hai

ajiib josh-e-junūñ hai us kā ajiib tarz-e-vafā hai merā

maiñ lamha lamha simaT rahī huuñ vo reza reza bikhar rahā hai

nazar meñ rañgīn shāmiyāne mohabbatoñ ke na.e fasāne

ye kaun hai dil ke vasvasoñ meñ jo mujh ko bechain kar rahā hai

tamām alfāz miT chuke haiñ bas ek saf.ha abhī hai baaqī

use musalsal maiñ paḌh rahī huuñ jo naqsh dil par ubhar rahā hai

vo mere ashkoñ ke aa.ine meñ sajā hai 'mīnā' kuchh is tarah se

ki jaise shabnam ke qatre qatre meñ koī sūraj sañvar rahā hai

bulandiyon ka tha jo musafir wo pastiyon se guzar raha hai

tamam din ka sulagta suraj samundaron mein utar raha hai

tumhaari yaadon ke phul aise sahar ko aawaz de rahe hain

ki jaise ThanDi hawa ka jhonka meri gali se guzar raha hai

alag hain nazren alag nazare ajab hain raaz-o-niyaz sare

kisi ke jazbe chamak rahe hain kisi ka ehsas mar raha hai

ajib josh-e-junun hai us ka ajib tarz-e-wafa hai mera

main lamha lamha simaT rahi hun wo reza reza bikhar raha hai

nazar mein rangin shamiyane mohabbaton ke nae fasane

ye kaun hai dil ke waswason mein jo mujh ko bechain kar raha hai

tamam alfaz miT chuke hain bas ek safha abhi hai baqi

use musalsal main paDh rahi hun jo naqsh dil par ubhar raha hai

wo mere ashkon ke aaine mein saja hai 'mina' kuchh is tarah se

ki jaise shabnam ke qatre qatre mein koi suraj sanwar raha hai