bulbul ka uDaya dil nahaq ye KHam-KHayali phulon ki

bulbul kā uḌāyā dil nāhaq ye ḳhām-ḳhayālī phūloñ kī

letī hai talāshī bād-e-sabā ab Daalī Daalī phūloñ kī

ye husn-o-latāfat ye ḳhushbū ye rañg-e-fazā ye josh-e-numū

aalam hai anokhā kaliyoñ kā duniyā hai nirālī phūloñ kī

misl-e-bulbul nik.hat se chhuTe dam bhar ko chaman mumkin hī nahīñ

hotī hai tasadduq phūloñ par ḳhud rahne vaalī phūloñ kī

maanā ki luTā.e rātoñ ko gulzār meñ motī shabnam ne

jab sub.h huī sūraj niklā to jeb thī ḳhālī phūloñ kī

gulchīñ kī bhī nazreñ uThtī haiñ sarsar ke bhī jhoñke aate haiñ

ho aise meñ kis se kyuuñ kar kab tak ye rakhvālī phūloñ kī

aatī hai ḳhizāñ ab ruḳhsat kar zinda jo rahe phir ā.eñge

ham se to na dekhī jā.egī maalī pāmālī phūloñ kī

har barg-e-shajar par ḳhush ho kar gulshan meñ nichhāvar karne ko

nik.hat kā ḳhazāna khol diyā himmat hai ye aalī phūloñ kī

phir rut badlī phir abr uThā phir sard havā.eñ chalne lagīñ

ho jaa.e parī ban jaa.e dulhan ab Daalī Daalī phūloñ kī

hāroñ meñ guñdhe jakḌe bhī ga.e gulshan bhī chhuTā siina bhī chhiddā

pahuñche magar un kī gardan tak ye ḳhush-iqbālī phūloñ kī

sayyād ke ghar se gulshan tak allāh kabhī pahuñchā.e mujhe

ummīd nahīñ maiñ ḳhush ho kar dekhūñ ḳhush-hālī phūloñ kī

gul-gasht meñ bhī chalte phirte kaam us ne kiyā ayyārī kā

iḳhlās baḌhā kar phūloñ se har baat uḌā lī phūloñ kī

māshūqoñ ke dahne baa.eñ to ushshāq kā majma.a rahtā hai

dekhī na anādil se ham ne mahfil kabhī ḳhālī phūloñ kī

ham apne dil meñ dāġhoñ ko yuuñ dekhte haiñ yuuñ dekhte haiñ

kartā hai nigahbānī jaise gulzār meñ maalī phūloñ kī

jo lutf kabhī hāsil thā hameñ vo lutf chaman ke saath gayā

ab kunj-e-qafas meñ khīñchte haiñ tasvīr-e-ḳhyālī phūloñ kī

shabnam ke bhī qatre gulshan meñ bad-mast kiye dete haiñ mujhe

labrez mai-e-ishrat se huī ek ek pyālī phūloñ kī

har misra-e-tar se hai paidā gul-hā-e-mazāmīñ kā jalva

ai 'nūh' kahūñ maiñ is ko ġhazal yā samjhūñ Daalī phūloñ kī

bulbul ka uDaya dil nahaq ye KHam-KHayali phulon ki

leti hai talashi baad-e-saba ab Dali Dali phulon ki

ye husn-o-latafat ye KHushbu ye rang-e-faza ye josh-e-numu

aalam hai anokha kaliyon ka duniya hai nirali phulon ki

misl-e-bulbul nikhat se chhuTe dam bhar ko chaman mumkin hi nahin

hoti hai tasadduq phulon par KHud rahne wali phulon ki

mana ki luTae raaton ko gulzar mein moti shabnam ne

jab subh hui suraj nikla to jeb thi KHali phulon ki

gulchin ki bhi nazren uThti hain sarsar ke bhi jhonke aate hain

ho aise mein kis se kyun kar kab tak ye rakhwali phulon ki

aati hai KHizan ab ruKHsat kar zinda jo rahe phir aaenge

hum se to na dekhi jaegi mali pamali phulon ki

har barg-e-shajar par KHush ho kar gulshan mein nichhawar karne ko

nikhat ka KHazana khol diya himmat hai ye aali phulon ki

phir rut badli phir abr uTha phir sard hawaen chalne lagin

ho jae pari ban jae dulhan ab Dali Dali phulon ki

haaron mein gundhe jakDe bhi gae gulshan bhi chhuTa sina bhi chhidda

pahunche magar un ki gardan tak ye KHush-iqbaali phulon ki

sayyaad ke ghar se gulshan tak allah kabhi pahunchae mujhe

ummid nahin main KHush ho kar dekhun KHush-haali phulon ki

gul-gasht mein bhi chalte phirte kaam us ne kiya ayyari ka

iKHlas baDha kar phulon se har baat uDa li phulon ki

mashuqon ke dahne baen to ushshaq ka majma rahta hai

dekhi na anadil se hum ne mahfil kabhi KHali phulon ki

hum apne dil mein daghon ko yun dekhte hain yun dekhte hain

karta hai nigahbani jaise gulzar mein mali phulon ki

jo lutf kabhi hasil tha hamein wo lutf chaman ke sath gaya

ab kunj-e-qafas mein khinchte hain taswir-e-KHyali phulon ki

shabnam ke bhi qatre gulshan mein bad-mast kiye dete hain mujhe

labrez mai-e-ishrat se hui ek ek pyali phulon ki

har misra-e-tar se hai paida gul-ha-e-mazamin ka jalwa

ai 'nuh' kahun main is ko ghazal ya samjhun Dali phulon ki