bulbul ko phir chaman mein laga lai bu-e-gul

bulbul ko phir chaman meñ lagā laa.ī bū-e-gul

ai kaash hotī gul-badanoñ meñ bhī ḳhū-e-gul

dil daaġh daaġh us meñ ḳhayāl-e-ḳhirām-e-nāz

jis tarah uḌtī phirtī ho gulshan meñ bū-e-gul

āshiq hī jab nahīñ to ḳhizāñ hai bahār-e-husn

bulbul ke saath saath ga.ī ābrū-e-gul

rāz-e-mohabbat aur dil-e-ġhuncha tā-ba-kai

niklegī bū ke parde meñ har ārzū-e-gul

lo 'shād' sair-e-gul se bhī nafrat huī unheñ

samjhe magar ki bū-e-mohabbat hai bū-e-gul

bulbul ko phir chaman mein laga lai bu-e-gul

ai kash hoti gul-badanon mein bhi KHu-e-gul

dil dagh dagh us mein KHayal-e-KHiram-e-naz

jis tarah uDti phirti ho gulshan mein bu-e-gul

aashiq hi jab nahin to KHizan hai bahaar-e-husn

bulbul ke sath sath gai aabru-e-gul

raaz-e-mohabbat aur dil-e-ghuncha ta-ba-kai

niklegi bu ke parde mein har aarzu-e-gul

lo 'shad' sair-e-gul se bhi nafrat hui unhen

samjhe magar ki bu-e-mohabbat hai bu-e-gul