bura na man kaha hai ye maine wahshat mein

burā na maan kahā hai ye maiñ ne vahshat meñ

mire salīqe se merī nibhī mohabbat meñ

nahīñ hai is ke sivā kuchh mirī hikāyat meñ

ḳhushī ke harf likhe maiñ ne ġham kī hālat meñ

ye jaan kar huā mashġhūl maiñ tilāvat meñ

bahut hai fā.eda ḳhushbūoñ kī tijārat meñ

tū hī batā ki maiñ ḳhud ko kahāñ talāsh karūñ

bichhaḌ gayā huuñ maiñ ḳhud se tirī mohabbat meñ

bahut zarūrī hai ḳhud se mukālima karnā

ziyāda lutf jab aane lage ibādat meñ

hazār ḳhvāhisheñ pā leñ hazār ḳhvāb bune

milā vahī jo likhā thā hamārī qismat meñ

zavāl kahnā paḌegā use bhī qadroñ kā

fareb khātā nahīñ ab koī muravvat meñ

vo shaḳhs jo tire dukh dard oḌhe phirtā thā

usī kā zikr nahīñ hai tirī masarrat meñ

chaTaḳhtī kaise na us ke makān kī buniyād

naqab lagā.ī thī us ne paḌos kī chhat meñ

kabhī firāq kī ghaḌiyāñ kabhī visāl ke pal

hamesha rahtī nahīñ ziist ek hālat meñ

ilaaj jis kā kisī se na ho sakā 'shībān'

kuchh aisā dard hai pinhā hamārī hijrat meñ

bura na man kaha hai ye main ne wahshat mein

mere saliqe se meri nibhi mohabbat mein

nahin hai is ke siwa kuchh meri hikayat mein

KHushi ke harf likhe main ne gham ki haalat mein

ye jaan kar hua mashghul main tilawat mein

bahut hai faeda KHushbuon ki tijarat mein

tu hi bata ki main KHud ko kahan talash karun

bichhaD gaya hun main KHud se teri mohabbat mein

bahut zaruri hai KHud se mukalima karna

ziyaada lutf jab aane lage ibaadat mein

hazar KHwahishen pa len hazar KHwab bune

mila wahi jo likha tha hamari qismat mein

zawal kahna paDega use bhi qadron ka

fareb khata nahin ab koi murawwat mein

wo shaKHs jo tere dukh dard oDhe phirta tha

usi ka zikr nahin hai teri masarrat mein

chaTaKHti kaise na us ke makan ki buniyaad

naqab lagai thi us ne paDos ki chhat mein

kabhi firaq ki ghaDiyan kabhi visal ke pal

hamesha rahti nahin zist ek haalat mein

ilaj jis ka kisi se na ho saka 'shiban'

kuchh aisa dard hai pinha hamari hijrat mein