buri nazron se tab hi hum dekhte hain

burī nazroñ se tab hī ham dekhte haiñ

hameñ ye ḳhabar hai vo kam dekhte haiñ

ye kis ne kahā hai ki kam dekhte haiñ

na tum dekh paao jo ham dekhte haiñ

unheñ kyā ḳhabar jā chukā hai kabhī kā

hamārā vo ab aa ke dam dekhte haiñ

vo dhamkā ga.e marte marte bhī mujh ko

tujhe to ham agle janam dekhte haiñ

ai qāsid ḳhud un ko mirā haal kahnā

ziyāda vo sunte haiñ kam dekhte haiñ

jo pūchhī pasandīda shai dekhne meñ

kahā shauq se terā ġham dekhte haiñ

kabhī ham se muñh pherte haiñ vo apnā

palaT kar kabhī ek dam dekhte haiñ

magan haiñ vo apne ḳhayāloñ meñ 'hāris'

ye un kī balā se ki ham dekhte haiñ

buri nazron se tab hi hum dekhte hain

hamein ye KHabar hai wo kam dekhte hain

ye kis ne kaha hai ki kam dekhte hain

na tum dekh pao jo hum dekhte hain

unhen kya KHabar ja chuka hai kabhi ka

hamara wo ab aa ke dam dekhte hain

wo dhamka gae marte marte bhi mujh ko

tujhe to hum agle janam dekhte hain

ai qasid KHud un ko mera haal kahna

ziyaada wo sunte hain kam dekhte hain

jo puchhi pasandida shai dekhne mein

kaha shauq se tera gham dekhte hain

kabhi hum se munh pherte hain wo apna

palaT kar kabhi ek dam dekhte hain

magan hain wo apne KHayalon mein 'haaris'

ye un ki bala se ki hum dekhte hain