but jaane kisi ko na KHuda mane kisi ko

but jaane kisī ko na ḳhudā maane kisī ko

dīvāna tirā kab bhalā gardāne kisī ko

vo raat hī is jism pe aatī thī barābar

vo raat bhī vo le gayā pahnāne kisī ko

ḳhush-shakl milā tujh sā to phir baat alag thī

varna na sunā.e tire afsāne kisī ko

is pyaas ko ab pyaas hī sairāb karegī

sahrā kī taraf le ga.e maiḳhāne kisī ko

gar bhiiḌ hai to bhiiḌ ke ādāb nibhā.e

is bhiiḌ meñ ab koī na pahchāne kisī ko

chhoḌ aao udhar raunaq-e-bāzār kī ḳhvāhish

yuuñ aate nahīñ raas ye vīrāne kisī ko

but jaane kisi ko na KHuda mane kisi ko

diwana tera kab bhala gardane kisi ko

wo raat hi is jism pe aati thi barabar

wo raat bhi wo le gaya pahnane kisi ko

KHush-shakl mila tujh sa to phir baat alag thi

warna na sunae tere afsane kisi ko

is pyas ko ab pyas hi sairab karegi

sahra ki taraf le gae maiKHane kisi ko

gar bhiD hai to bhiD ke aadab nibhae

is bhiD mein ab koi na pahchane kisi ko

chhoD aao udhar raunaq-e-bazar ki KHwahish

yun aate nahin ras ye virane kisi ko