but KHuda kaba sanam-KHana bana sakti hai

but ḳhudā ka.aba sanam-ḳhāna banā saktī hai

kyā se kyā jur.at-e-rindāna banā saktī hai

jism ke ḳhol meñ haivāñ ko chhupā kar tahzīb

shahr ke vast meñ vīrāna banā saktī hai

vāqi.a shart nahīñ hai ki zabān-e-maḳhlūq

baat be-bāt bhī afsāna banā saktī hai

sa.ī se ban nahīñ saktī hai azal kī bigḌī

ye tirī shān-e-karīmāna banā saktī hai

zehn kī soch pe mabnī hai bahisht-o-dozaḳh

aql ye bastiyāñ rozāna banā saktī hai

khusravī apnī jagah ḳhuub hai lekin dil ko

mutma.in tab-e-faqīrāna banā saktī hai

kis ko ma.alūm thā 'shaukat' ki ab is umr meñ bhī

ek laḌkī hameñ dīvāna banā saktī hai

but KHuda kaba sanam-KHana bana sakti hai

kya se kya jurat-e-rindana bana sakti hai

jism ke KHol mein haiwan ko chhupa kar tahzib

shahr ke wast mein virana bana sakti hai

waqia shart nahin hai ki zaban-e-maKHluq

baat be-baat bhi afsana bana sakti hai

sai se ban nahin sakti hai azal ki bigDi

ye teri shan-e-karimana bana sakti hai

zehn ki soch pe mabni hai bahisht-o-dozaKH

aql ye bastiyan rozana bana sakti hai

khusrawi apni jagah KHub hai lekin dil ko

mutmain tab-e-faqirana bana sakti hai

kis ko malum tha 'shaukat' ki ab is umr mein bhi

ek laDki hamein diwana bana sakti hai