but yahan milte nahin hain ya KHuda milta nahin

but yahāñ milte nahīñ haiñ yā ḳhudā miltā nahīñ

azm mustahkam to ho duniyā meñ kyā miltā nahīñ

ham-safīrān-e-junūñ yuuñ ham se aage baḌh ga.e

qāfila kyā hai ġhubār-e-qāfila miltā nahīñ

apnī sūrat dekhnā ho apne dil meñ dekhiye

dil sā duniyā meñ koī bhī aa.ina miltā nahīñ

de diyā hai aap ko dil ab hifāzat kījiye

har ḳhazāne meñ ye la.al-e-be-bahā miltā nahīñ

DhūñDhtā phirtā hai mujh ko kyuuñ fareb-e-rañg-o-bū

maiñ vahāñ huuñ ḳhud jahāñ apnā pata miltā nahīñ

but yahan milte nahin hain ya KHuda milta nahin

azm mustahkam to ho duniya mein kya milta nahin

ham-safiran-e-junun yun hum se aage baDh gae

qafila kya hai ghubar-e-qafila milta nahin

apni surat dekhna ho apne dil mein dekhiye

dil sa duniya mein koi bhi aaina milta nahin

de diya hai aap ko dil ab hifazat kijiye

har KHazane mein ye lal-e-be-baha milta nahin

DhunDhta phirta hai mujh ko kyun fareb-e-rang-o-bu

main wahan hun KHud jahan apna pata milta nahin