buton ki aankh mein kya KHwab jhilmilata hai

butoñ kī aañkh meñ kyā ḳhvāb jhilmilātā hai

rukā huā ho jo manzar to kaun aatā hai

usī ke lams se zinda nuqūsh haiñ mere

vo apne haath se mūrat merī banātā hai

vo zarf dekh ke detā hai dard chāhat ke

phir us ke ba.ad mohabbat ko āzmātā hai

ridā-e-charḳh meñ Tāñke haiñ hijr ne taare

ye suut sadiyoñ kī ḳhāmoshiyoñ ne kaatā hai

vafā kā likhtā hai anjām ishq se pahle

phir us ke ba.ad nagar pyaar kā basātā hai

tumhāre hote hue ḳhaak ho ga.ī kaise

tumhāre saath mirā kis tarah kā naatā hai

rukā huā hai jo manzar vo us kā hissa hai

bhalā lakīr se bāhar bhī koī aatā hai

buton ki aankh mein kya KHwab jhilmilata hai

ruka hua ho jo manzar to kaun aata hai

usi ke lams se zinda nuqush hain mere

wo apne hath se murat meri banata hai

wo zarf dekh ke deta hai dard chahat ke

phir us ke baad mohabbat ko aazmata hai

rida-e-charKH mein Tanke hain hijr ne tare

ye sut sadiyon ki KHamoshiyon ne kata hai

wafa ka likhta hai anjam ishq se pahle

phir us ke baad nagar pyar ka basata hai

tumhaare hote hue KHak ho gai kaise

tumhaare sath mera kis tarah ka nata hai

ruka hua hai jo manzar wo us ka hissa hai

bhala lakir se bahar bhi koi aata hai