buton ki kakulon ke dekh kar pech

butoñ kī kākuloñ ke dekh kar pech

paḌe haiñ dil pe kyā kyā pech par pech

tarīq-e-ishq be-rahbar na ho tai

ki hai ye rah nihāyat pech-dar-pech

na hove dil kī tukkal kaT ke barbād

agar Daale na vo tār-e-nazar pech

vo zulf us kī jo hai pur-pech o pur-ḳham

kamand-e-jāñ hai ai dil us kā har pech

'nazīr' ik roz apne zaḳhm-e-sar ko

jo bāñdhā ham ne de kar beshtar pech

nazar karte hī us sarkash ne ik baar

kahā kar ke suḳhan kā muḳhtasar pech

duā diije hamārī teġh ko aaj

ki jis ne aap ko baḳhshā ye sar-pech

buton ki kakulon ke dekh kar pech

paDe hain dil pe kya kya pech par pech

tariq-e-ishq be-rahbar na ho tai

ki hai ye rah nihayat pech-dar-pech

na howe dil ki tukkal kaT ke barbaad

agar Dale na wo tar-e-nazar pech

wo zulf us ki jo hai pur-pech o pur-KHam

kamand-e-jaan hai ai dil us ka har pech

'nazir' ek roz apne zaKHm-e-sar ko

jo bandha hum ne de kar beshtar pech

nazar karte hi us sarkash ne ek bar

kaha kar ke suKHan ka muKHtasar pech

dua dije hamari tegh ko aaj

ki jis ne aap ko baKHsha ye sar-pech