bu-e-gul ke muraqabe mein hun

bū-e-gul ke murāqabe meñ huuñ

yā'nī pahle se maiñ maze meñ huuñ

āsmāñ tak uḌaan bharnī hai

ik parinde se rābte meñ huuñ

tere gun milte haiñ sabhī mujh se

yā'nī maiñ tere zā.iche meñ huuñ

vo sahelī se baat kar rahī hai

maiñ bhī yāroñ ke mashvare meñ huuñ

us kī āñkhoñ se niiñd ġhā.eb hai

aur maiñ shak ke dā.ere meñ huuñ

tere hāthoñ se pī thī chaa.e kabhī

aaj tak us ke zā.iqe meñ huuñ

tum ko dekhā to hosh meñ aayā

varna kahtā ki maiñ nashe meñ huuñ

ḳhushk pattoñ sī zindagī merī

ik ḳhizāñ ke muhāsare meñ huuñ

us kī sāñsoñ meñ dard gahrā hai

jis diye ko sañbhālne meñ huuñ

'aks merā talāshne vaale

us kī āñkhoñ ke aa.ine meñ huuñ

mujh ko hairat se dekhtī kyoñ hai

zindagī tere falsafe meñ huuñ

bu-e-gul ke muraqabe mein hun

ya'ni pahle se main maze mein hun

aasman tak uDan bharni hai

ek parinde se rabte mein hun

tere gun milte hain sabhi mujh se

ya'ni main tere zaiche mein hun

wo saheli se baat kar rahi hai

main bhi yaron ke mashware mein hun

us ki aankhon se nind ghaeb hai

aur main shak ke daere mein hun

tere hathon se pi thi chae kabhi

aaj tak us ke zaiqe mein hun

tum ko dekha to hosh mein aaya

warna kahta ki main nashe mein hun

KHushk patton si zindagi meri

ek KHizan ke muhasare mein hun

us ki sanson mein dard gahra hai

jis diye ko sanbhaalne mein hun

'aks mera talashne wale

us ki aankhon ke aaine mein hun

mujh ko hairat se dekhti kyon hai

zindagi tere falsafe mein hun