bu-e-mai pa ke main chalta hua mai-KHane ko

bū-e-mai pā ke maiñ chaltā huā mai-ḳhāne ko

ik parī thī ki lagā le ga.ī dīvāne ko

mere saaqī sā kahāñ koī pilāne vaalā

āñkheñ kahtī haiñ luTā dījiye mai-ḳhāne ko

saḳhtī-e-ishq uThāne kā zamāna na rahā

ab to hai phuul bhī pathar tire dīvāne ko

haath meñ aate hī kyā paañv nikāle saaqī

āfrīñ hai tire chalte hue paimāne ko

is meñ ai ahl-e-vatan raa.e tumhārī kyā hai

kahtī hai vahshat-e-dil ghar se nikal jaane ko

chal gayā kaam yahāñ jaam chale yā na chale

bāda-kash lauT ga.e dekh kai mai-ḳhāne ko

dil sulagte raheñ parvā nahīñ hotī kuchh unheñ

sham.a achchhī ki jalā detī hai parvāne ko

shāmil-e-daur hoñ aġhyār sitam hai saaqī

apne paimāne se baḌhne de na paimāne ko

Husn-e-ḳhidmat kā sila dekhiye yuuñ paate haiñ

ruḳh milā aa.ine ko zulf milī shāne ko

chaal hai mast nazar mast adā meñ mastī

jaise aate haiñ vo TuuTe ho.e mai-ḳhāne ko

abr meñ barq kā rah rah ke chamaknā kaisā

ye bhī ik us kī hai shoḳhī mire taḌpāne ko

is meñ ai parda-nashīñ parda-darī kis kī hai

dekhne aatī hai ḳhilqat tire dīvāne ko

ḳhuub insāf hai ai bāda-kasho kyā kahnā

tum ko taskīn ho gardish ho jo paimāne ko

hai baḌī chiiz lagī dil kī ḳhudā jas ko de

aag meñ kuud paḌā dekhiye parvāne ko

ho ke pāband-e-junūñ sab se rihā.ī paa.ī

beḌiyāñ lipTī thiiñ lākhoñ tire dīvāne ko

khiñch chukī teġh to ab hai ye rukāvaT kaisī

aap taḌpāne ko aa.e haiñ ki tarsāne ko

koī aisī bhī hai sūrat tire sadqe saaqī

rakh luuñ maiñ dil meñ uThā kar tire mai-ḳhāne ko

but-e-pindār ko toḌo to ho dil paak 'jalīl'

tum ḳhudā-ḳhāna banāo isī but-ḳhāne ko

bu-e-mai pa ke main chalta hua mai-KHane ko

ek pari thi ki laga le gai diwane ko

mere saqi sa kahan koi pilane wala

aankhen kahti hain luTa dijiye mai-KHane ko

saKHti-e-ishq uThane ka zamana na raha

ab to hai phul bhi pathar tere diwane ko

hath mein aate hi kya panw nikale saqi

aafrin hai tere chalte hue paimane ko

is mein ai ahl-e-watan rae tumhaari kya hai

kahti hai wahshat-e-dil ghar se nikal jaane ko

chal gaya kaam yahan jam chale ya na chale

baada-kash lauT gae dekh kai mai-KHane ko

dil sulagte rahen parwa nahin hoti kuchh unhen

shama achchhi ki jala deti hai parwane ko

shamil-e-daur hon aghyar sitam hai saqi

apne paimane se baDhne de na paimane ko

Husn-e-KHidmat ka sila dekhiye yun pate hain

ruKH mila aaine ko zulf mili shane ko

chaal hai mast nazar mast ada mein masti

jaise aate hain wo TuTe hoe mai-KHane ko

abr mein barq ka rah rah ke chamakna kaisa

ye bhi ek us ki hai shoKHi mere taDpane ko

is mein ai parda-nashin parda-dari kis ki hai

dekhne aati hai KHilqat tere diwane ko

KHub insaf hai ai baada-kasho kya kahna

tum ko taskin ho gardish ho jo paimane ko

hai baDi chiz lagi dil ki KHuda jas ko de

aag mein kud paDa dekhiye parwane ko

ho ke paband-e-junun sab se rihai pai

beDiyan lipTi thin lakhon tere diwane ko

khinch chuki tegh to ab hai ye rukawaT kaisi

aap taDpane ko aae hain ki tarsane ko

koi aisi bhi hai surat tere sadqe saqi

rakh lun main dil mein uTha kar tere mai-KHane ko

but-e-pindar ko toDo to ho dil pak 'jalil'

tum KHuda-KHana banao isi but-KHane ko