buDhe bargad pe sham ho gai hai

būḌhe bargad pe shaam ho ga.ī hai

ek duniyā tamām ho ga.ī hai

paḌ gayā hai udāsiyoñ kā rivāj

jis kī ḳhilqat ġhulām ho ga.ī hai

us gale ke baTan khule do tiin

raushnī be-niyām ho ga.ī hai

ham ravayyoñ pe kaam kar na sake

aaj taḳhrīb aam ho ga.ī hai

din bitāyā thā fikr-e-fardā meñ

raat maazī ke naam ho ga.ī hai

us galī meñ qiyām hai merā

be-gharī be-maqām ho ga.ī hai

us ke chhūne se bhī harā na huā

ye ḳhizānī davām ho ga.ī hai

āb-zāroñ pe jam ga.ī kaa.ī

zindagī tishna-kām ho ga.ī hai

saañs āhista chal rahī hai 'munīr'

maut kyoñ tez-gām ho ga.ī hai

buDhe bargad pe sham ho gai hai

ek duniya tamam ho gai hai

paD gaya hai udasiyon ka riwaj

jis ki KHilqat ghulam ho gai hai

us gale ke baTan khule do tin

raushni be-niyam ho gai hai

hum rawayyon pe kaam kar na sake

aaj taKHrib aam ho gai hai

din bitaya tha fikr-e-farda mein

raat mazi ke nam ho gai hai

us gali mein qiyam hai mera

be-ghari be-maqam ho gai hai

us ke chhune se bhi hara na hua

ye KHizani dawam ho gai hai

aab-zaron pe jam gai kai

zindagi tishna-kaam ho gai hai

sans aahista chal rahi hai 'munir'

maut kyon tez-gam ho gai hai