buzurgon ko nai naslon ne hairani mein rakkha hai

buzurgoñ ko na.ī nasloñ ne hairānī meñ rakkhā hai

namak mahfūz rakhne ke liye paanī meñ rakkhā hai

bas itnī baat hai ḳhud kī pareshānī miTāne ko

amīr-e-shahr ne sab ko pareshānī meñ rakkhā hai

ye mustaqbil meñ kaam aa.egā is ko ġhaur se dekho

jo manzar merī in āñkhoñ kī vīrānī meñ rakkhā hai

kahāñ vo baat phūloñ aur falak ke chāñd tāroñ meñ

ḳhudā ne husn jaisā husn-e-insānī meñ rakkhā hai

ḳhulūs aḳhlāq hai kachche makānoñ ke makīnoñ meñ

hasad buġhz-o-adāvat qasr-e-sultānī meñ rakkhā hai

rafū-gar bhī pareshāñ ho ke āḳhir pūchh hī baiThā

batāo kaisā nasha chāk-dāmānī meñ rakkhā hai

ye us kī maslahat hai vo hameñ yuuñ āzmātā hai

kabhī tangī kabhī us ne farāvānī meñ rakkhā hai

hamāre daur ke bachche bahut chālāk haiñ 'sāġhar'

piyāla duudh kā billī kī nigarānī meñ rakkhā hai

buzurgon ko nai naslon ne hairani mein rakkha hai

namak mahfuz rakhne ke liye pani mein rakkha hai

bas itni baat hai KHud ki pareshani miTane ko

amir-e-shahr ne sab ko pareshani mein rakkha hai

ye mustaqbil mein kaam aaega is ko ghaur se dekho

jo manzar meri in aankhon ki virani mein rakkha hai

kahan wo baat phulon aur falak ke chand taron mein

KHuda ne husn jaisa husn-e-insani mein rakkha hai

KHulus aKHlaq hai kachche makanon ke makinon mein

hasad bughz-o-adawat qasr-e-sultani mein rakkha hai

rafu-gar bhi pareshan ho ke aaKHir puchh hi baiTha

batao kaisa nasha chaak-damani mein rakkha hai

ye us ki maslahat hai wo hamein yun aazmata hai

kabhi tangi kabhi us ne farawani mein rakkha hai

hamare daur ke bachche bahut chaalak hain 'saghar'

piyala dudh ka billi ki nigarani mein rakkha hai