chaha hai ajab Dhang se chahat bhi ajab hai

chāhā hai ajab Dhang se chāhat bhī ajab hai

mahbūb ajab hai ye mohabbat bhī ajab hai

pallū mirā thāmā hai ka.ī baar ḳhirad ne

par in dinoñ jazboñ kī baġhāvat bhī ajab hai

jakḌā hai tirī yaad ne afkār ko mere

hamdam tire jazbāt meñ shiddat bhī ajab hai

qurbat ke hasīñ phuul mirī ruuh pe vaare

kyā ḳhuub saḳhī hai ye saḳhāvat bhī ajab hai

ik āriz-e-gul par jamā shabnam sā vo qatra

kirnoñ se zarā qabl rifāqat bhī ajab hai

lahja tirā dahkā huā lagtā hai ġhazab kā

ġhusse-bhare lahje meñ harārat bhī ajab hai

chehra tirā taptā huā dikhtā hai tapish se

mastī-bhare nainoñ meñ sharārat bhī ajab hai

baazī kabhī haarī nahīñ zālim ne anā kī

chāleñ bhī ajab us kī siyāsat bhī ajab hai

ḳhud qaid-e-vafā kaaT ke dī us ko rihā.ī

'bāno' ye tire dil kī adālat bhī ajab hai

chaha hai ajab Dhang se chahat bhi ajab hai

mahbub ajab hai ye mohabbat bhi ajab hai

pallu mera thama hai kai bar KHirad ne

par in dinon jazbon ki baghawat bhi ajab hai

jakDa hai teri yaad ne afkar ko mere

hamdam tere jazbaat mein shiddat bhi ajab hai

qurbat ke hasin phul meri ruh pe ware

kya KHub saKHi hai ye saKHawat bhi ajab hai

ek aariz-e-gul par jama shabnam sa wo qatra

kirnon se zara qabl rifaqat bhi ajab hai

lahja tera dahka hua lagta hai ghazab ka

ghusse-bhare lahje mein hararat bhi ajab hai

chehra tera tapta hua dikhta hai tapish se

masti-bhare nainon mein shararat bhi ajab hai

bazi kabhi haari nahin zalim ne ana ki

chaalen bhi ajab us ki siyasat bhi ajab hai

KHud qaid-e-wafa kaT ke di us ko rihai

'bano' ye tere dil ki adalat bhi ajab hai