chahat tumhaari sine pe kya gul katar gai

chāhat tumhārī siine pe kyā gul katar ga.ī

kis ḳhush-salīqagī se jigar chaak kar ga.ī

rakkhī thī jo sambhāl ke tū ne salāmtī

vo tere ba.ad kis ko patā kis ke ghar ga.ī

jo zindagī sameT ke rakkhī thī aaj tak

ik lamha-e-ḳhafīf meñ yaksar bikhar ga.ī

bhaTke hue the aise ki gard-e-safar ko ham

muḌ muḌ ke dekhte rahe manzil guzar ga.ī

ik umr dhuup meñ jo palī thī vo kashmakash

saaya ghane daraḳht kā dekhā to Dar ga.ī

hairat hai kuchh patā na chalā kaise zindagī

jaisī guzarnī thī mirī vaisī guzar ga.ī

ochhoñ kī tab.a 'āzar'-e-ḳhush-ḳhū se pūchhiye

juuñ hī havā-e-vaqt lagī bas aphar ga.ī

chahat tumhaari sine pe kya gul katar gai

kis KHush-saliqagi se jigar chaak kar gai

rakkhi thi jo sambhaal ke tu ne salamti

wo tere baad kis ko pata kis ke ghar gai

jo zindagi sameT ke rakkhi thi aaj tak

ek lamha-e-KHafif mein yaksar bikhar gai

bhaTke hue the aise ki gard-e-safar ko hum

muD muD ke dekhte rahe manzil guzar gai

ek umr dhup mein jo pali thi wo kashmakash

saya ghane daraKHt ka dekha to Dar gai

hairat hai kuchh pata na chala kaise zindagi

jaisi guzarni thi meri waisi guzar gai

ochhon ki taba 'azar'-e-KHush-KHu se puchhiye

jun hi hawa-e-waqt lagi bas aphar gai