chahaton ko nit-nae andaz se dekha karo

chāhatoñ ko nit-na.e andāz se dekhā karo

vasl kī rāhat meñ furqat kā samāñ likkhā karo

kyā pata un kī bhī lag jaa.e koī qīmat kahīñ

sañg-rezo ko bhī hīroñ kī tarah parkhā karo

zaat ke sahrā meñ kar pāoge kyā apnī talāsh

umr bhar pīchhe sarāb-e-zīst ke bhāgā karo

ik havā-e-tund kā jhoñkā uḌā le jā.egā

ret ke siine pe koī naam mat likkhā karo

tum bahut ghabrā ga.e ghar kī vīrānī se 'faiz'

ab hujūm-e-shahr meñ tanhā.iyāñ DhūñDā karo

chahaton ko nit-nae andaz se dekha karo

wasl ki rahat mein furqat ka saman likkha karo

kya pata un ki bhi lag jae koi qimat kahin

sang-rezo ko bhi hiron ki tarah parkha karo

zat ke sahra mein kar paoge kya apni talash

umr bhar pichhe sarab-e-zist ke bhaga karo

ek hawa-e-tund ka jhonka uDa le jaega

ret ke sine pe koi nam mat likkha karo

tum bahut ghabra gae ghar ki virani se 'faiz'

ab hujum-e-shahr mein tanhaiyan DhunDa karo