chahe bhale hon chahe bure hon har surat taDpate hain

chāhe bhale hoñ chāhe bure hoñ har sūrat taḌpāte haiñ

mehr-o-vafā kī baat nahīñ hai dost bahut yaad aate haiñ

duniyā dhokā maayā khoTī log yahāñ sab jhūTe haiñ

kaisī kaisī bāteñ kar ke ham dil ko bahlāte haiñ

dil hī apnā bas meñ nahīñ hai dil hī apnā dushman hai

auroñ par ilzām nahīñ vo to apne ban jaate haiñ

kaisā hañsnā kaisā ronā ek tamāsha duniyā kā

ārā.ish kā qumquma jaise jalte haiñ bujh jaate haiñ

terā naam bhī lab par laate ab is vāste Darte haiñ

log bahut haiñ aur logoñ meñ afsāne ho jaate haiñ

jaisī ham par guzrī sab par aisī kuchh hī guzartī hai

jhūTe sachche qissoñ se ham kaun sī baat banāte haiñ

yuuñ to shāyad koī milā ho lekin bichhḌe kitne dost

jis ko kho dete haiñ goyā sirf usī ko paate haiñ

chahe bhale hon chahe bure hon har surat taDpate hain

mehr-o-wafa ki baat nahin hai dost bahut yaad aate hain

duniya dhoka maya khoTi log yahan sab jhuTe hain

kaisi kaisi baaten kar ke hum dil ko bahlate hain

dil hi apna bas mein nahin hai dil hi apna dushman hai

auron par ilzam nahin wo to apne ban jate hain

kaisa hansna kaisa rona ek tamasha duniya ka

aaraish ka qumquma jaise jalte hain bujh jate hain

tera nam bhi lab par late ab is waste Darte hain

log bahut hain aur logon mein afsane ho jate hain

jaisi hum par guzri sab par aisi kuchh hi guzarti hai

jhuTe sachche qisson se hum kaun si baat banate hain

yun to shayad koi mila ho lekin bichhDe kitne dost

jis ko kho dete hain goya sirf usi ko pate hain