chahe so hamein kar tu gunahgar hain tere

chāhe so hameñ kar tū gunahgār haiñ tere

taqdīr thī apnī ki giraftār haiñ tere

marte haiñ kabhī aa ke hamārī bhī ḳhabar le

aah ai but-e-bedard ye bīmār haiñ tere

naqd-e-dil-o-dīñ muft meñ de baiTheñge āḳhir

ham āshiq-e-muflis ki ḳharīdār haiñ tere

ḳhvāhish hai na bose kī na āġhosh se matlab

dīdār ke yaañ sirf talabgār haiñ tere

hai rū-e-zamīñ arsa-e-mahshar unheñ har roz

jo dil-shuda-e-qāmat-o-raftār haiñ tere

ham vasl meñ aur hijr meñ jalte rahe un se

kyā dāġh-e-jigar ye gul-e-ruḳhsār haiñ tere

saugand hai 'hasrat' mujhe ejāz-e-suḳhan kī

ye sehr haiñ jaadū haiñ na ash.ār haiñ tere

chahe so hamein kar tu gunahgar hain tere

taqdir thi apni ki giraftar hain tere

marte hain kabhi aa ke hamari bhi KHabar le

aah ai but-e-bedard ye bimar hain tere

naqd-e-dil-o-din muft mein de baiThenge aaKHir

hum aashiq-e-muflis ki KHaridar hain tere

KHwahish hai na bose ki na aaghosh se matlab

didar ke yan sirf talabgar hain tere

hai ru-e-zamin arsa-e-mahshar unhen har roz

jo dil-shuda-e-qamat-o-raftar hain tere

hum wasl mein aur hijr mein jalte rahe un se

kya dagh-e-jigar ye gul-e-ruKHsar hain tere

saugand hai 'hasrat' mujhe ejaz-e-suKHan ki

ye sehr hain jadu hain na ashaar hain tere