chahiye parhez-e-gardish chashm-e-shoKH-e-yar ko

chāhiye parhez-e-gardish chashm-e-shoḳh-e-yār ko

ghūmne se jab ziyāñ hai mardum-e-bīmār ko

huuñ marīz-e-ishq hai ye dard merā lā-davā

hogī sehhat kyā masīhā se tire bīmār ko

nāvak-e-be-par agar hai us kī mizhgān-e-darāz

qaus kyoñ samjhe na āshiq abrū-e-ḳhamdār ko

merī hī nafrat ne kī ulfat raqīboñ se sivā

vasl kī daulat mayassar kyoñ na ho aġhyār ko

shām-e-ġhurbat hijr meñ to vasl meñ sub.h-e-vatan

dekhtā huuñ apne ghar meñ sāya-e-dīvār ko

kyā qayāmat hai darāzī-e-shab-e-yaldā-e-hijr

roz-e-mahshar par jo rakkhā vāda-e-dīdār ko

ek dirham kī ise ḳhvāhish to lākhoñ kī use

shukr muflis se ziyāda hai kahīñ zardār ko

naqd-e-jāñ de kar zuleḳhā ne liyā saudā-e-ishq

husn-e-yūsuf kī jo dekhā garmī-e-bāzār ko

ibn-e-ādam se bhī chhīnī ishq hī ne saltanat

kar diyā muhtāj isī ne mālik-e-dīnār ko

is zamāne meñ baḌī hotī hai zardāroñ kī qadr

pūchhtā hai kaun 'ājiz' muflis-e-nādār ko

chahiye parhez-e-gardish chashm-e-shoKH-e-yar ko

ghumne se jab ziyan hai mardum-e-bimar ko

hun mariz-e-ishq hai ye dard mera la-dawa

hogi sehhat kya masiha se tere bimar ko

nawak-e-be-par agar hai us ki mizhgan-e-daraaz

qaus kyon samjhe na aashiq abru-e-KHamdar ko

meri hi nafrat ne ki ulfat raqibon se siwa

wasl ki daulat mayassar kyon na ho aghyar ko

sham-e-ghurbat hijr mein to wasl mein subh-e-watan

dekhta hun apne ghar mein saya-e-diwar ko

kya qayamat hai daraazi-e-shab-e-yalda-e-hijr

roz-e-mahshar par jo rakkha wada-e-didar ko

ek dirham ki ise KHwahish to lakhon ki use

shukr muflis se ziyaada hai kahin zardar ko

naqd-e-jaan de kar zuleKHa ne liya sauda-e-ishq

husn-e-yusuf ki jo dekha garmi-e-bazar ko

ibn-e-adam se bhi chhini ishq hi ne saltanat

kar diya muhtaj isi ne malik-e-dinar ko

is zamane mein baDi hoti hai zardaron ki qadr

puchhta hai kaun 'ajiz' muflis-e-nadar ko