chahte ho jo koi khanDar dekhna

chāhte ho jo koī khañDar dekhnā

dosto ik nazar merā ghar dekhnā

lab hilā.e haiñ maiñ ne ḳhilāf-e-sitam

ab balā aa.egī mere sar dekhnā

pahle ghar ke charāġhoñ pe rakkho nazar

baad meñ tum ye shams-o-qamar dekhnā

aisā lagtā hai mere muqaddar meñ hai

dāman-e-zindagī ḳhuuñ se tar dekhnā

de rahe ho havā yaad rakhnā magar

sho.ala ban jā.egā ye sharar dekhnā

ham ne sab sah liye tere zulm-o-sitam

ab duā kā hamārī asar dekhnā

ḳhair se aap ne ḳhair dekhā hai ḳhair

rahnumā se kabhī us kā shar dekhnā

terī chashm-e-ināyat kā tālib huuñ maiñ

ik nigāh-e-ġhalat hī magar dekhnā

kaash 'darvesh' ho merī taqdīr meñ

manzar-e-ḳhushnumā umr bhar dekhnā

chahte ho jo koi khanDar dekhna

dosto ek nazar mera ghar dekhna

lab hilae hain main ne KHilaf-e-sitam

ab bala aaegi mere sar dekhna

pahle ghar ke charaghon pe rakkho nazar

baad mein tum ye shams-o-qamar dekhna

aisa lagta hai mere muqaddar mein hai

daman-e-zindagi KHun se tar dekhna

de rahe ho hawa yaad rakhna magar

shoala ban jaega ye sharar dekhna

hum ne sab sah liye tere zulm-o-sitam

ab dua ka hamari asar dekhna

KHair se aap ne KHair dekha hai KHair

rahnuma se kabhi us ka shar dekhna

teri chashm-e-inayat ka talib hun main

ek nigah-e-ghalat hi magar dekhna

kash 'darwesh' ho meri taqdir mein

manzar-e-KHushnuma umr bhar dekhna