chaal aisi wo shoKH chalta hai

chaal aisī vo shoḳh chaltā hai

hashr kā jis pe dam nikaltā hai

ashk-e-ḳhūñ kyuuñ na aañkh se Tapkeñ

dil kā armāñ yūñhī nikaltā hai

sāqiyā ek jaam ke chalte

kitne pyāsoñ kā kaam chaltā hai

maiñ kisī sarzamīñ kā qasd karūñ

āsmāñ saath saath chaltā hai

haa.e gardish vo chashm-e-sāqī kī

maiñ ye samjhā ki jaam chaltā hai

sarv hai naam naḳhl-e-ulfat kā

phūltā hai kabhī na phaltā hai

kyā zamāna bhī hai asiir tirā

ki ishāre pe tere chaltā hai

tiir dil kā na khīñch rahne de

lutf-e-sohbat hai jī bahaltā hai

sher-e-rañgīñ na samjho un ko 'jalīl'

tūti-e-fikr laal ugaltā hai

chaal aisi wo shoKH chalta hai

hashr ka jis pe dam nikalta hai

ashk-e-KHun kyun na aankh se Tapken

dil ka arman yunhi nikalta hai

saqiya ek jam ke chalte

kitne pyason ka kaam chalta hai

main kisi sarzamin ka qasd karun

aasman sath sath chalta hai

hae gardish wo chashm-e-saqi ki

main ye samjha ki jam chalta hai

sarw hai nam naKHl-e-ulfat ka

phulta hai kabhi na phalta hai

kya zamana bhi hai asir tera

ki ishaare pe tere chalta hai

tir dil ka na khinch rahne de

lutf-e-sohbat hai ji bahalta hai

sher-e-rangin na samjho un ko 'jalil'

tuti-e-fikr lal ugalta hai