chand bhi khoya khoya sa hai tare bhi KHwabida hain

chāñd bhī khoyā khoyā sā hai taare bhī ḳhvābīda haiñ

aaj fazā ke bojhal-pan se lahje bhī sanjīda haiñ

jaane kin kin logoñ se is dard ke kyā kyā rishte the

hijr kī is ābād sarā meñ sab chehre nādīda haiñ

itne barsoñ ba.ad bhī donoñ kaise TuuT ke milte haiñ

tū hai kitnā sāda-dil aur ham kitne pechīda haiñ

sun jānāñ ham tark-e-ta.alluq aur kisī din kar leñge

aaj tujhe bhī ujlat sī hai ham bhī kuchh ranjīda haiñ

kānoñ meñ ik sargoshī hai be-ma.anī sī sargoshī

āñkhoñ meñ kuchh ḳhvāb saje haiñ ḳhvāb bhī umr-rasīda haiñ

ghar kī vo maḳhdūsh imārat gir ke phir ta.amīr huī

ab āñgan meñ peḌ haiñ jitne saare shāḳh burīda haiñ

is bastī meñ ek saḌak hai jis se ham ko nafrat hai

us ke nīche pagDanDī hai jis ke ham girvīda haiñ

chand bhi khoya khoya sa hai tare bhi KHwabida hain

aaj faza ke bojhal-pan se lahje bhi sanjida hain

jaane kin kin logon se is dard ke kya kya rishte the

hijr ki is aabaad sara mein sab chehre nadida hain

itne barson baad bhi donon kaise TuT ke milte hain

tu hai kitna sada-dil aur hum kitne pechida hain

sun jaanan hum tark-e-talluq aur kisi din kar lenge

aaj tujhe bhi ujlat si hai hum bhi kuchh ranjida hain

kanon mein ek sargoshi hai be-mani si sargoshi

aankhon mein kuchh KHwab saje hain KHwab bhi umr-rasida hain

ghar ki wo maKHdush imarat gir ke phir tamir hui

ab aangan mein peD hain jitne sare shaKH burida hain

is basti mein ek saDak hai jis se hum ko nafrat hai

us ke niche pagDanDi hai jis ke hum girwida hain