chand chhune ki dhun mein hue jate hain dur miTTi se hum humse miTTi bahut

chāñd chhūne kī dhun meñ hue jaate haiñ duur miTTī se ham ham se miTTī bahut

chāñd kā haath aanā na aanā hī kyā sāneha to hai miTTī se duurī bahut

jab ki sab ik ravish hī pe hoñ gāmzan rah judā karnā āsān hai jān-e-man

sach kā aise meñ jaama karo zeb-tan jhuuT ke jab hoñ chou-tarfā haamī bahut

ḳhauf kā dil meñ tūfān rakhā gayā pā-ba-zanjīr mehmān rakhā gayā

ham ko mahrūm-e-irfān rakhā gayā be-sabab to nahīñ mehrbānī bahut

vaar saare hī us ke dhare rah ga.e pai-ba-pai go badaltā rahā paiñtare

maiñ ne chāhā numūd-e-hunar vo kare thī vagarna mirī ik hī baazī bahut

laakh maanā ki nā-tajarba-kār hai tajarbe se magar kyā sarokār hai

ishq ko husn ke nāz-o-andāz kī hotī hī hai samajh-būjh thoḌī bahut

be-sabab pūchhtā bhī nahīñ aadmī be-ġharaz thūktā bhī nahīñ aadmī

aaj ḳhud mere dar tak chale aa.e ho vāqa.ī kaam thā kyā zarūrī bahut

jaan be-shak mirī le le nazrāna vo baḳhsh de bas muāfī kā parvāna vo

maan kar mujh ko 'gulfām' dīvāna vo kar nahīñ letā kyoñ zarf aalī bahut

chand chhune ki dhun mein hue jate hain dur miTTi se hum hum se miTTi bahut

chand ka hath aana na aana hi kya saneha to hai miTTi se duri bahut

jab ki sab ek rawish hi pe hon gamzan rah juda karna aasan hai jaan-e-man

sach ka aise mein jama karo zeb-tan jhuT ke jab hon chou-tarfa hami bahut

KHauf ka dil mein tufan rakha gaya pa-ba-zanjir mehman rakha gaya

hum ko mahrum-e-irfan rakha gaya be-sabab to nahin mehrbani bahut

war sare hi us ke dhare rah gae pai-ba-pai go badalta raha paintare

main ne chaha numud-e-hunar wo kare thi wagarna meri ek hi bazi bahut

lakh mana ki na-tajarba-kar hai tajarbe se magar kya sarokar hai

ishq ko husn ke naz-o-andaz ki hoti hi hai samajh-bujh thoDi bahut

be-sabab puchhta bhi nahin aadmi be-gharaz thukta bhi nahin aadmi

aaj KHud mere dar tak chale aae ho waqai kaam tha kya zaruri bahut

jaan be-shak meri le le nazrana wo baKHsh de bas muafi ka parwana wo

man kar mujh ko 'gulfam' diwana wo kar nahin leta kyon zarf aali bahut